LOFPRYSING BY WIERDAPARK TAXISTAANPLEK

Sondag 19 Feb om 13:00

As deel van die bediening van die gemeenskap in ons omgewing word ‘n erediens Sondag 19 Feb om 13:00 by die Wierdapark Taxistaanplek gehou. Hierdie is ‘n uitreik van Tsoseletso bediening na  mense wat Sondae by die Wierdapark winkelkompleks en parkeerterrein in groepies saam sit en nie inskakel by enige gemeente nie.  Enigiemand van ons gemeente, of huishulpe, is welkom om die diens te kom bywoon wat in Sotho en Zulu gehou sal word.

Belangstellendes en gemeentelede kan betrokke raak deur hulp te kom aanbied met:
•    Die opslaan van ‘n gazebo
•    Stoele en tafels aanry en uitpak
•    Klanktoerusting vervoer en opstel
•    Krag aanlê en pamflette uitdeel
•    Gebed voor en tydens die erediens

Belangstellendes kan skakel met Danie Snyman by 083 325 6336 of Cain Mazibuko by 073 098 6336 voor Vrydag 17 Februarie 2012.

ALMAL IS BAIE WELKOM OM DEEL TE NEEM!

Huisves tieners uit Vlaandere!

Hendrik Badenhorst skryf:

Ek doen vryskutwerk vir verskeie dokumentêre programme onder andere op KykNet.

Ons is tans besig met navorsing vir 'n Vlaamse TV program. Ons is op soek na 'n interessante, Christelike, Afrikaanse gesin wat hulle kinders opvoed met morele waardes en 'n warm hart. Verkieslik 'n gesin met kinders tussen 14 en 20 jaar.

Ons is op soek na 'n Afrikaanse Christelike gesin wat hul gasvryheid wil aanbied om twee tieners vanuit Vlaanderen, België, vir 'n week te huisves sodat hulle met die tieners in die gesin 'n tipies Christelike
jongmenslewe kan ervaar.

Ons poog dus dat die Vlaamse tieners' n eg Suid-Afrikaanse manier van opvoeding ervaar en 'n beter begrip kry van die Afrikaner se waardes en norme. Dit sal ook vir die kyker interessant wees om te sien hoe tieners in verkillende kulture opgroei.

Ons beplan om die verblyf van die tieners te verfilm (hul daaglikse roetine, skool, stokperdjies, sport, ontspanning, ens), en sal die gesin vergoed vir enige onkostes. Die gesin sal ook 'n betaling van R10 000 ontvang.

Ons sal dit waardeer as u hierdie versoek aan u gemeentelede sal oordra, sodat gesinne wat in aanmerking wil kom en wat belangstel om aan hierdie projek deel te neem, met my in verbinding kan tree.

Hulle kan my kontak by hendrikbadenhorst@live.com of 071 516 3923.

Dr Johan van den Heever: Magister Theologiae

Die Gemeenteraad het in 2009 goedgekeur dat Dr Johan vir 'n M-graad in Spiritualiteit aan die Universiteit van die Vrystaat kan inskryf.

Die kursus het twee jaar geduur en in die proses het hy genoeg professionele krediete verwerf vir ‘n siklus van 5 jaar.

Ons is trots daarop dat hy al sy vakke met onderskeiding geslaag het.

Baie geluk Dr Johan!

Manie Roodt
Voorsitter Diensvehoudinge

Besluite van die NG sinode

Hier is die amptelike besluite oor die  doop, bediening van bevryding, huwelik en saamwoon soos dit vandag deur die Algemene Sinode van die NG Kerk in Boksburg goedgekeur is en deur die notulekommissie aan ons beskikbaar gestel is.

BESLUITE RONDOM DIE DOOP

DOOP

1.  Die Algemene Sinode bevestig ons gereformeerde oortuiging dat die Verbondsdoop uitdrukking gee aan die grondwaarheid van die Evangelie dat God se genade en trou te alle tye ons gelowige aanvaarding daarvan voorafgaan en selfs omsluit.

2.  Die Algemene Sinode vra daarom kerkrade en predikante om die gereformeerde verstaan van die verbondsdoop met oortuiging en deernis te verduidelik en te bevestig, ook aan lidmate wat ander oortuigings oor die doop huldig.

3.  Die Algemene Sinode gee terselfdertyd erkenning aan die feit dat Christelike kerke nie almal dieselfde Doopbeskouing huldig nie, maar dat ons nogtans saam met mekaar deel uitmaak van die Kerk van Christus.

4.  Die Algemene Sinode gee dankbaar erkenning aan lidmate wat ten spyte van hulle ander verstaan van die doop steeds lojaal bly aan die kerkverband en wil hulle verseker dat hulle 'n geestelike tuiste in die NG Kerk het.

5.  Die Algemene Sinode vra opreg verskoning vir lidmate wat op een of ander wyse rondom die doop seergekry het, en nooi hulle uit tot onderlinge gesprek waar daar op pastorale wyse saam oor die saak gesels en gebid kan word.

6.  Die Algemene Sinode verseker lidmate wat die NG Kerk vanweë hulle doopverstaan verlaat het, dat die NG Kerk ’n geestelik tuiste wil wees vir alle kinders van die Here en nooi hulle hartlik uit om hulle regmatige plek in hulle plaaslike NG gemeente in te neem en saam te werk aan die koms van God se koninkryk.

VERTREKPUNTE VIR GESPREK

1.  Die Sinode is van oordeel dat die gesprek en beredenering oor die gereformeerde vertrekpunte van die doop deur die jare in die Nederduitse Gereformeerde Kerk deurdag is en ’n rykdom van teologie ontsluit.

2.  Die Sinode bevestig weer dat die verbondsteologie sentraal staan in die beredenering van doopherdenking of -herinnering.

3.  Die Algemene Sinode bevestig dat in gehoorsaamheid aan die verbondsbelofte van ouers, ouers en die kerk verantwoordelikheid moet aanvaar vir die verbondsonderrig (kategese) van hul gedoopte kinders sodat hulle gelei word tot ’n toe-eiening van die heil (belydenisaflegging) wat nie aan ’n bepaalde ouderdom gekoppel kan word nie (soos tans in die kerkorde vasgestel word), en versoek daarom die Taakspan Kategese om die plek, aard en ouderdom vir belydenisaflegging te ondersoek.

4.  Die Sinode besluit om niks by te voeg tot die gesprek oor die doop, kindernagmaal en kategese nie, maar wel net te fokus op die opdrag oor doopviering.

TERMINOLOGIE

1.  Die Sinode beveel aan dat die kerk eerder die woorde doopherdenking of doopherinnering sal gebruik.

RIGLYNE VIR DIE HERDENKING/HERINNERING

1.  Die Sinode bevestig dat die heil altyd en in alle omstandighede gevier moet word.

2.  Die Algemene Sinode wys lidmate daarop dat die gereelde viering van die nagmaal die primêre plek van viering is.

3.  Die Algemene Sinode bevestig dat die doopherinnering/viering nie as ’n her/weerdoop interpreteer mag word nie, maar direk met die verbonds-/christelike doop saamhang.

4.  Die Sinode besluit dat gemeentes aangemoedig word om geleenthede te skep waar doopherinnering of herdenking deel word van lidmate en gemeentes se verhaal.

5.  Die Sinode beveel aan dat sakramentsviering ’n groter rol binne liturgie, kategese en die erediens sal speel.

6.  Dit staan Kerkrade ook vry om toepaslike rituele te vestig wat die behoefte van sulke lidmate opvang om simbolies uitdrukking te gee aan hulle sterwe en opstanding saam met Christus.

7.  Hierdie rituele is nie Sakramente nie en vervang nie die Verbondsdoop nie.

OPDRAGTE RONDOM DIE DOOP

1.  Die Algemene Sinode gee aan ADGO opdrag om ’n taakspan te benoem wat ondersoek doen na wyses waarop daar aan doopherinnering / doopherdenking gestalte gegee kan word.

2.  AKLAS word versoek om die Sinode te bedien met ’n dokument wat die noodsaak van die verhouding tussen die doop as eenmalige toesegging in die heil en nagmaal as herhalende viering van die heil binne die verbondsteologie belig.

DIE BEDIENING VAN BEVRYDING

1.  Die Algemene Sinode bely met blydskap die oorwinning van Jesus Christus oor al die manifestasies van die duiwel, bose magte, boosheid en kwaad in hierdie wêreld.

2.  Die Algemene Sinode aanvaar dat hierdie oorwinning in baie gevalle nog nie ten volle sigbaar is nie, dat ons dikwels oorweldig is deur hierdie boosheid wat groter is as onsself, ook juis weens die swakheid van die mens, die verleiding van die sonde en die gebroke werklikheid.

3.  Die Algemene Sinode aanvaar daarom dat ons as kinders van God nog steeds in ’n geestelike stryd gewikkel is teen die boosheid in al sy manifestasies in die wêreld, maar veral teen die kwaad wat in elke mens skuil.

4.  Die Algemene Sinode bevestig weer eens dat dit van uiterste belang is dat die kerk sal leef vanuit die geloofsperspektief dat, hoewel die Bose gelowiges steeds bedreig soos ’n brullende leeu en versoek soos ’n engel van die lig, die bose deur die lewe, sterwe en opstanding van Jesus en die uitstorting van God se Gees oorwin en aan bande gelê is.

5.  Daarom meen die Algemene Sinode dat enige sogenaamde bediening van bevryding wat die geloofswaarheid oor die lewe en werk van Jesus en die Gees van God misken, geen bediening van die evangelie is nie en ook geen vryheid bring nie.

6.  Die Algemene Sinode moedig daarom alle gelowiges aan om deur die krag van die Heilige Gees (in die gees van die oorwinning van Jesus) die boosheid die stryd aan te sê deur spesifiek te fokus op die genadige verlossingswerk van Christus, sodat die kerk die ware kenmerke van Evangeliese gehoorsaamheid (liefde, genade, vergifnis en versoening) sal vertoon.

7.  Die Algemene Sinode aanvaar die werklikheid dat daar ’n wye diversiteit van interpretasies en toepassing van die Bybelse boodskap oor die bose en demone binne die NG Kerk is. Daar is ruimte vir lidmate wat aan die werklike en persoonlike aard van die duiwel en demone glo, en daar is ruimte vir lidmate wat die Bybelse spreke oor die bose en duiwels anders interpreteer.

8.  Die Algemene Sinode oordeel dat die getuienis van leraars en lidmate van die NG Kerk dat hulle in hulle bediening wel mense teëgekom het van wie hulle oortuig was dat hulle deur bose magte of demone gedemoniseer was – en ook hulle getuienis dat ’n bediening van bevryding baie van hierdie mense van kwellings, vreesagtigheid, haat teenoor God en sy gebod bevry het – nie sonder meer afgewys moet word nie. Die Sinode aanvaar dat daar verskillende interpretasies is oor die werklikheid al dan nie van gedemoniseerdheid. Dit geld ook vir die interpretasie oor wie en wat agter bepaalde bevrydinge lê.

9.  In die lig daarvan is dit die oordeel van die Algemene Sinode dat ’n bediening van bevryding as ’n buitengewone bedieningshandeling onder bepaalde voorwaardes toegelaat sou kon word eerder as om dit geheel en al te verbied. Die voorwaardes waaronder so ’n bediening toegelaat sou kon word, hou in dat:

9.1 die bediening van bevryding as ’n buitengewone bediening beoefen sal word en nie as deel van ’n roetine-pastoraat nie;

9.2 dit onder toesig van en met rapport aan die kerkraad en die ring gedoen word;

9.3 die persoon ook vir mediese evaluering verwys moet word. Daar rus ’n swaar verantwoordelikheid op persone wat so ’n bediening beoefen om mense nie skade te berokken deur siekte (onder meer psigiatriese versteurings) as besetenheid of gedemoniseerdheid te behandel nie;

9.4 daar met sorg gewaak word teen ’n animistiese verstaan van die skepping en teen die neiging om te dink daar skuil magiese kragte in sekere voorwerpe; teen lang konfronterende gesprekke met bose magte, asook teen die gepaardgaande triomfalisme wat straal uit sensasionele byeenkomste van bevryding;

9.5 daar verreken moet word dat die Gees van Christus in mense wat aan Christus behoort en sy Naam bely, leef. Bedieningspraktyke wat die algenoegsaamheid van die werk van Christus minag en daarmee die gereformeerde belydenis van die volkome verlossingswerk van die genadige God in Jesus op die spel plaas, word afgewys.

10.  Die Algemene Sinode besef dat die verskillende kulture in ons land ons duidelik bewus gemaak het van die veel-fasettige aard van die siening oor die Bose; dat daar kontekste is waarin daar ’n werklike vrees vir eksterne bose magte is wat baie mense se lewens oorheers en dat hierdie lewenservaring ernstig opgeneem behoort te word. Die Algemene Sinode moedig daarom sy eie ampsdraers en lidmate aan, wat in sulke kontekste werk, om op verantwoorde wyse besondere aandag hieraan te gee met die doel om die radikale verlossingswerk van Christus met oorgawe te verkondig.

BESLUITE RONDOM DIE HUWELIK EN SAAMWOON – ALGEMENE SINODE VAN DIE NG KERK

HUWELIK EN SAAMWOON

1.  Die Algemene Sinode neem kennis van die verslag en spreek sy waardering uit vir die kommissie se eerlike poging om verantwoordelik met hierdie kontekstuele saak om te gaan.

2.  Die Algemene Sinode besef dat die huwelik soos ons dit vandag ken die produk van eeue se ontwikkeling is. Daarom kan sommige huweliksgebruike soos in die Bybel beskryf, byvoorbeeld leviraatshuwelike en die vrou as besitting, nie sonder meer dien as riglyne vir hoe Christelike huwelike vandag behoort te wees nie.

3.  Die Algemene Sinode erken dat saamwoonverhoudings (wat die seksuele insluit) vandag ʼn werklikheid in die samelewing is. Daar is verskillende redes waarom mense saamwoon. Sommige mense woon saam omdat hulle seksuele eksklusiwiteit nie as ’n belangrike aspek van ’n verhouding beskou nie. Hierdie verhoudings is weens die nie-permanente en selfsugtige aard daarvan, eties onaanvaarbaar.

4.  Die Algemene Sinode is bewus daarvan egter dat daar ander redes is waarom ander pare saamwoon. Sommige woon saam met die argument dat hulle die huwelik hoog ag en daarom seker wil maak dat hulle in alle opsigte by mekaar pas, ook wat die seksuele betref, voordat hulle trou. Hierdie verhoudings reflekteer in baie opsigte die Bybelse waardes van liefde, respek en eksklusiwiteit en kan dus nie sonder meer afgewys word nie.

5.  Die Algemene Sinode is nogtans daarvan oortuig dat die historiese ontwikkeling van die huwelik in die Bybel en in die geskiedenis vir ons duidelike riglyne bied van wat ’n Christelike huwelik is: ’n vaste, formele ooreenkoms tussen twee persone van die teenoorgestelde geslag om hulle lewens in alle opsigte met mekaar te deel in ’n lewenslange verbintenis waarin seksualiteit ‘n eksklusiewe karakter dra, geseën of bevestig deur die kerk, gesluit in die teenwoordigheid van getuies, sover as moontlik in die gemeenskap van gelowiges en verkieslik erken deur die staat as ’n wettige huwelik.

6.  Die Algemene Sinode oordeel dat, in die lig van bostaande, gelowiges met reg die huwelik ’n gawe van God noem en dat seksuele gemeenskap buite so ’n vaste, formele ooreenkoms nie aan Christelike riglyne voldoen nie.

7.  Die Algemene Sinode beskou die reëlings van mediese fondse en pensioenskemas wat voordele van mense ontneem wanneer hulle na die dood van ’n eggenoot/eggenote weer in die huwelik tree, as eties problematies en onderneem om nogeens met die betrokke owerhede hieroor in gesprek te tree.

8.  Die Algemene Sinode wil mense wat in ʼn etiese saamwoonverhouding leef en dus die Christelike norme vir die huwelik uitleef, aanmoedig om die verbintenis nog vaster te maak deur die kerklike en staatkundige aspekte ook in plek te kry.

9.  Bostaande besluite word nie afsonderlik nie, maar deurgaans as ’n eenheid beskou oor die kerk se standpunt ten opsigte van die saamwoon van ongetroudes.

10.  Die Algemene Sinode aanvaar dat al die implikasie rondom die bevestiging van ’n enkel kerklike huweliksverbintenis nog nie uitgeklaar is nie en daarom op hierdie stadium nie ten gunste van so ’n reëling nie.

PASTORALE VERSORGING

1.  Die Sinode versoek leraars om in pastorale hantering van pare-in-verhouding, hulle met deernis te begelei van onvolledige verbintenisse na die omvattende, Bybelse verbintenis van die Christelike huwelik, en hierdie ideaal nooit af te water nie.

OPDRAGTE

1.  Ons verwys vir ondersoek na ’n kommissie die vraagstuk van die veranderende seksuele raamwerk en seksuele waardes van ons gemeenskappe.

2.  Die Sinode word versoek om ’n huwelikskursus te ontwikkel wat aan die jeug en ander vrywillig bedien word in die jaar na belydenis aflegging. Die oorsprong van huweliksprobleme word dan aangespreek en word die simptome (soos saamwoon) voorkom. Tans is die leiding vir die huwelik nie voldoende nie en word voorbeelde van ouers en die media slaafs nagevolg.

3.  Die Algemene Sinode gee opdrag aan die Moderamen om weë te soek waarin daar met die staat en ander rolspelers in gesprek getree word om wyses te vind waar daar nie teen persone gediskrimineer word op grond van die voortgaande voordele verbonde aan mediese fondse en pensioenskemas nie.

DIE HUWELIK SE ROL EN PLEK

1.  Die Algemene sinode bevestig die plek en waarde van die Christelike huwelik in die kerk en die gemeenskap en motiveer leraars en lidmate om die duursaamheid daarvan te bevorder.

2.  Die Algemene sinode versoek leraars en lidmate om gesonde huwelike aktief te bevorder en moeite te doen met huweliksvoorbereiding en huweliksverryking, omdat die idee en praktyk van huwelike verskraal het.

3.  Die Algemene Sinode motiveer gemeentes om jaarliks op die tweede Sondag van Februarie wêreldhuweliksdag te vier.

Vriendelike groete

Ben du Toit

Sentrum vir Kommunikasie
Privaatsak X8, Bellville, 7535
Tel: 021 957 7195
Faks: 021 957 7197
kommunikasie@kaapkerk.co.za

Nuwe lede van Gemeenteraad en ander ampte

Die gemeenteraad het op 25 Augustus 2011 die volgende lede verkies of herkies as lede van die gemeenteraad:

Verkies tot Voorsitter van die GR         Ludwig Gebhardt
O/Voorsitter van die GR                       Manie Roodt
Skriba (GB)                                          Francois van Staden

Herkies as Ouderlinge
Avril Malan                Regerende ouderling
Ina Malan                 Omsienerouderling Tieners
Hein Kotze               Omsienerouderling Kleingroepe
Barry Lamprecht      Omsienerouderling Kleingroepe

Herkies as Diaken
Francois Graaff (sonder sitting op GR)

Opgeroep met sitting op GR
Ouderling Ewald Beneke

Verkies tot Ouderling met sitting op die GR
Jaco Dorfling

Verkies tot Diakens met sitting op die GR
Pieter Fourie [Jun]   
Lukas Wiese       
Ian Wyethe       

Uittrede na 2 of meer termyne as GR-lid
Danie Snyman
Alta Theron


Augustus nuus uit Frankryk

Liewe vriende in Christus, 

Hartlike groete uit ʼn laat-somer Frankryk. Die seisoene is normaalweg hier deeglik “afgemerk”. Ons somer is amper verby en herfs lê voor die deur. Elke nuwe seisoen bied iets moois wat ons herinner dat God voortgaan met Sy skeppingswerk. Dit herinner ons ook dat Hy in Sy genade u en my lewe in Sy hand vashou. Ja,  totdat die bruidegom verskyn.  Wat ʼn wonderlike gerusstelling.

Persoonlik het ons deur diep waters gegaan die laaste twee weke: Eers ʼn letterlike oorstroming in ons dakkamer. Na deurdringende reën oor drie dae was die mat onder water en het water deur die mure gesuiwer. Dit het groot werk en kostes meegebring. Die Here is besig om op verskeie wyses daarin te voorsien en die werk vorder goed. Bid asseblief dat alles goed sal afloop en vir die Here se voorsiening.

Verder het ons meisiekind, Hélène-Laure, ʼn kiem in haar ingewande opgetel. Met geweldige pyn en koors is sy in die hospitaal opgeneem en in kwarantyn geplaas. Sy is weer uit en het steeds baie pyn en ongemak. Bid asseblief vir volledige genesing.

Die Senior Gebedsuitreik lê voor die deur: Begin September sal ʼn groep predikante van SA, hulle gades en Mari Meyer op die spore van die Hugenote oor Frankryk na verskeie onbereikte streke reis, hoofsaaklik BID en ook vir ʼn paar dae ver stap om ʼn deel van die Bybel aan mense in Clermont-Ferrand te versprei. Bid dat alles goed afloop met die duisende kilometers se reis en die laaste voorbereidings.

DEPUTASIE besoek: Ons is dankbaar vir al die uitnodigings wat ontvang is en vir mevrou Elise van Heerden se harde werk om dit te koördineer. Indien iemand kan help deur vir ons ʼn motor te leen tydens ons besoek aan die Wes-Kaap in Januarie 2012  sal ons baie dankbaar wees. Skryf asseblief direk aan my by bloemhof@free.fr

DV besoek ons Suid-Afrika in 2012 vir deputasie

• 8-29 Januarie 2012: Wes-Kaap
• 4-10 Februarie 2012: Reis oor Beaufort-Wes, Senekal en Bloemfontein
• 11 Februarie tot 11 Maart 2012: Pretoria, Gauteng, Mpumalanga

Rig asseblief u uitnodigings vir optredes by eredienste, bidure, selgroepe, ens. aan: Mev. Elize van Heerden e-pos: vh@telkomsa.net  Tel:(058)4812452/(058)4813320 Sel no: 073 0964420

Seënbede

Ds Johan en Rita BLOEMHOF Tel 0033160861989

Kommentaar op vorige 40 dae ...

Hierdie het ek op die gemeente se Facebook blad gekry:

"Ek was nie in 'n sel viri 40 dae nie (shock shock horror..) maar ek het dit tweede hands op so cool manier beleef. Ekt gesien hoe NG Eldoraigne rerig 'n familie word. Hoe daar 'n onteenseglike atmosfeer van harmonie en liefde tussen almal borrel by die feesdiens. Ek het gesien hoe mense soos my ouers totally uit hul comfort zones uit gehaal is en sulke amazing groei plaasgevind het dat mens nie kan help om opgewonde te wees nie. Die experiences wat mense gehad het was duidelik life-changing, en ek dink al gaan dit soms voel of jul "backslide"of die bubbly gevoel daarvan fade, weet net dit: niks wat jy ooit vir God op hierdie aarde doen of sê sal ooit verlore wees nie.Moenie vashou aan die cool gevoel van die experience nie, hou vas aan die feite, aan dit wat jul geleer het van God, van mekaar en van julself. Dis amazing grace. "

Uitreik in Frankryk

Liewe vriende in Christus,

Baie dankie dat julle soos Paulus in die gees deur gebed “teenwoordig was” by die uitreik. God het iets groots verrig...

Die paar SA jongmense, die Franse en ook die lidmate van die gemeente waarmee ons saamgewerk het in die Noorde van Frankryk, was uitstaande.  Hulle het ʼn verskil in feitlik 15 000 huisgesinne se lewens gemaak deur ʼn deel van God se Woord aan hulle te skenk.  Die feit dat so ʼn handjievol mense soveel in ʼn week se tyd kon versprei was ʼn wonder van Bo en ook  ʼn teken van die deursettingsvermoë van Suid-Afrikaners. Ons glo dat volgens God se belofte in Jesaja 55.10 en 11, Sy doel met Sy Woord bereik sal word en dat daar ewige vrug sal wees. Sy Woord kom nie onverrigter sake terug nie.

Iets besonders oor die uitreik was dat daar was feitlik daagliks goddelike afsprake in die strate was:

• Soms met tieners: Eers sien ek ʼn seun wat die Evangelie opskeur en in die lug gooi. Toe ek hom verduidelik dat dit ʼn “heilige boek van God” is tel hy dit op en sy sussie spreek hom sterk aan. Terselfdertyd is daar onder die groep ʼn dogter wat vir ʼn kleiner kind op daardie stadium al feitlik die helfte van die Evangelie boekie se verhaal oor Jesus gelees het. Dié dogtertjie roep uit: “Quelle belle histoire !” Watter mooi storie ! Ek sê gaan lees gerus meer daaroor op die webblad www.Dieu-t-m.com  (God het jou lief) en hulle sê ja, verseker.
• Die volgende dag kry ons twee ander tienerseuns wat opreg belanggestel in die Evangelie. Ek kry geleentheid om die Goeie Nuus breedvoerig aan hulle te verduidelik. Hulle straal en praat met ʼn groep ander kinders daaroor.
• Daarna gee God ʼn afspraak met ʼn koffie-restaurant eienaar. Nadat ek die koevertjie afgelewer het sien ek hom met gevoude arms my inwag op die sypaadjie. Ek dag by myself - hier kom moeilikheid. Manhaftig groet ek hom vriendelik: “Bonjour Monsieur” en wag op sy reaksie... Ek glo amper nie my ore nie!  Hy vertel dat hy die koevert se inhoud so waardeer, dat hy Evangelie aan sy kleinkinders gegee het en hulle aangemoedig het om dit te ontdek soos hyself die Bybel tydens sy kinderdae in die kerk ontdek het. Ons geniet ʼn lekker “Patiserie” en drink iets in sy “Café”.
• Nog ʼn goddelike afspraak was met ʼn wanhopige jong pa wie se vrou met die sterfte van hulle derde baba by geboorte hom verlaat het. Hy maak die ander twee seuntjies groot en lyk sommer verlore. Toe ek vir hom sê in die koeverte is Goeie Nuus wat hoop bied sê hy : “Ek het HOOP SO nodig?”. Ek kon deeglik met hom die Evangelie deel en hy was haastig om die Evangelie van Johannes in die koevertjie self die aand te gaan lees.
• Die pragtige persoonlike getuienisse van persoonlike Goddelike afsprake van die Uitreikspan het almal se harte aangeraak om te sien watter wonderlike pad God met ons jongmense stap...

Bid asseblief vir :

• Die opleiding van ʼn 40 tal kinderwerkers en leiers oor die volgende drie weke
• Die volgende twee SA uitreike wat voorlê
• Die Seniors Gebed uitreik onder leiding van ds Kobus van Zyl van Kommetjie (W-K) in September (Visas, goeie voorbereiding en beskerming)
• ʼn Uitreik na die Centre van Frankryk o.l.v. Pieter Boshoff van Grabouw

Johan Bloemhof

Ry, luister, leer ...

Pastoor Tom Holladay het 'n reeks praatjies beskikbaar op die Internet.  In sy woorde: 

"These devotions will take you through the Bible a book at a time, a chapter a week, listening to a ten-minute devotion each day. It's best to listen to only one of the ten minute devotions per day, for both learning and spending time with Jesus."

Jy kan die praatjies aflaai en op jou rekenaar luister, of as jy meer tegnies is, skryf dit op 'n CD of laai dit op jou selfoon en luister daarna oppad werk toe.

Tom Holladay is die skrywer van die boek wat ons in kleingroepe vanaf Julie gaan bespreek.

Kliek hier om meer te leer.

Die Gemeenteraad-vergadering 26 Mei 2011

1.    Die notule van ’n dagbestuursvergadering met ’n versoek van die boukommissie ten opsigte van behoeftes rondom die opgradering van die de Hoeveweg pastorie van dr van den Heever, is goedgekeur. Verslag is aan die GR gedoen dat die werk fluks vorder. Die badkamers is oorgedoen, teëls, baddens, wasbakke en storte is nou in volle gebruik. Die kombuiskaste word vervang en sekere kaste en rakke in die gesinskamer. Matte moet ook nog vervang word asook die plaveisel voor en rondom die woning.  Die geroeste waterpype is vervang en die dak is herstel.

2.    Tienerbediening: Ds André, Ina Malan, Thea Hamman en Hanro Vorstel doen verslag aan die GR rakende die bediening en hulle werksaamhede.  Hier volg die verslag:
Ons Garagedienste “kook”! Ons is baie dankbaar om te sê dat bywoning tans baie goed is. Die lofprysing– en aanbiddingspan speel ‘n baie groot rol in die atmosfeer wat geskep word en lei regtig ons mense tot lof en aanbidding. Die nuwe 18:00 tydgleuf werk baie goed. Wat baie verblydend is om te sien, is dat daar ook nuwe gesigte onder die volwassenes is.  Daar is ook weer nuwe lewe in ons jeugkleingroepe. Sean Viljoen het ‘n groot rol gespeel in die oorgangsfase van Etiénne na Hanro en het gesorg dat die groepe nie platval tydens die “herderlose” tyd nie. Hanro se koms het weer nuwe inisiatiewe losgemaak en ook nuwe “gesigte” gelok. Moet sy “funky” haarstyl wees!

Opsommend kan ek net sê dat ons baie dankbaar is vir die steun wat ons van die Gemeenteraad en die Bestuurskomitee ontvang. Dit maak ons hande sterk en ons “laste”  lig!  (Ouderling Ina Malan -Omsiener Snr. Jeug) .

3.    Verslag deur die BK oor die betrokkenheid van leraars by ons lidmate: Binne die gemeente se strategie dat ons ʼn missionêre gemeente is, gebaseer op ‘n kleingroepbedieningsmodel, het ons tog ook besluit dat ons meer na mekaar wil uitreik. Om dit te bewerkstellig sal die volgende werkswyse gevolg word:

•    Onbetrokke lidmate
Hierdie lidmate is steeds op ons gemeente se databasis, maar woon heel moontlik geen     eredienste by nie. Die name van die lede word deur gegee aan ons kleingroepe wat versoek     word om net kontak met hulle te maak, 'n hand van vriendskap uit te reik en as kommunikasie     kanaal na hulle te dien.

•    Lidmate in kleingroepe
Die kleingroepe word verdeel tussen die twee leraars. Afsprake word via die gemeentekantoor     met herderleiers gemaak en leraars besoek die kleingroepe sistematies soos hulle program dit toelaat.

•    Pastoraat
Gewone pastorale besoeke gaan steeds voort, hetsy op versoek van lidmate of soos deur leraars    geïnisieer.

•    Nuwe lidmate
Nuwe lidmate word kwartaalliks na die bekenstellingsgeleentheid vir nuwe lidmate genooi, waar     hulle met die gemeente se werksaamhede vertroud raak en van die leiers in die gemeente     ontmoet. Hulle word so gou moontlik by kleingroepe ingeskakel.

•    Senior lidmate
Ds Tewie Pieters besoek die senior lidmate op 'n sistematiese wyse. Hy hanteer ook hulle     pastoraat, tensy die ander leraars versoek word om daarby betrokke te raak.

•    Dooplidmate / senior jeug
Ons jeugwerkers hanteer die pastoraat soos versoek en van kennis geneem. Senior jeug word    aangemoedig om by kleingroepe vir die jeug in te skakel, onder leiding van die jeugwerker.

Binne ons huidige strategie staan dit enige lidmaat steeds vry om ter enige tyd leraars te kontak om hulle persoonlik aan huis te kom besoek.  

Ons bevestig opnuut ons strategie soos saamgevat in ons slagspreuk vir 2011:  “Eldoraigne Familiekerk – Missionêre gemeente in 'n jaar van omgee”. Versorging is ons almal se verantwoordelikheid omdat ons 'n geloofsfamilie is. Lidmate word steeds aangemoedig om by kleingroepe in te skakel en deel te wees van ons missionêre strewe.

4.    Finansies

Die doel van die FIN-KOMITEE van die NG ELDORAIGNE FAMILIEKERK:
Om die finansiële funksie van NG Eldoraigne Familiekerk te verrig ooreenkomstig erkende rekeningkundige praktyke. Dit word as volg gedoen:

• Opstel van ʼn jaarlikse begroting ooreenkomstig die lys van prioriteite wat deur die gemeenteraad verskaf word;
• Gereelde monitor (maandeliks) van die stand van die kerk se finansies en terugvoer aan die Advies aan die gemeenteraad rakende enige finansiële aangeleentheid wat die kerk se finansies beïnvloed of kan beïnvloed.

Die huidige FIN bestaan uit:
Pieter Fourie Snr.         [Voorsitter]
Andre Joubert (Leraar )     [Ondervoorsitter]
Francois van Staden        [Gemeentebestuurder]
Cisca Coetzee             [Fin admin beampte]
Johann Kaltwasser         [Lid van die Gemeenteraad]
Gerda Reyneke                             [Addisionele lid]

Die vergaderings van FIN word gewoonlik die tweede Dinsdag (09:00) van elke maand gehou en is oop vir enige belangstellendes.

Die Gemeenteraad het sy 2de gewone vergadering in die konsistorie gehou op

26   Mei 2011 om 19:00.

1.      Die notule van ’n dagbestuursvergadering met ’n versoek van die boukommissie ten opsigte van behoeftes rondom die opgradering van die de Hoeveweg pastorie van dr van den Heever, is goedgekeur. Verslag is aan die GR gedoen dat die werk fluks vorder. Die badkamers is oorgedoen, teëls, baddens, wasbakke en storte is nou in volle gebruik. Die kombuiskaste word vervang en sekere kaste en rakke in die gesinskamer. Matte moet ook nog vervang word asook die plaveisel voor en rondom die woning.  Die geroeste waterpype is vervang en die dak is herstel.

2.      Tienerbediening: Ds André, Ina Malan, Thea Hamman en Hanro Vorstel doen verslag aan die GR rakende die bediening en hulle werksaamhede.  Hier volg die verslag:

Ons Garagedienste “kook”! Ons is baie dankbaar om te sê dat bywoning tans baie goed is. Die lofprysing– en aanbiddingspan speel ‘n baie groot rol in die atmosfeer wat geskep word en lei regtig ons mense tot lof en aanbidding. Die nuwe 18:00 tydgleuf werk baie goed. Wat baie verblydend is om te sien, is dat daar ook nuwe gesigte onder die volwassenes is.  Daar is ook weer nuwe lewe in ons jeugkleingroepe. Sean Viljoen het ‘n groot rol gespeel in die oorgangsfase van Etiénne na Hanro en het gesorg dat die groepe nie platval tydens die “herderlose” tyd nie. Hanro se koms het weer nuwe inisiatiewe losgemaak en ook nuwe “gesigte” gelok. Moet sy “funky” haarstyl wees!

Opsommend kan ek net sê dat ons baie dankbaar is vir die steun wat ons van die Gemeenteraad en die Bestuurskomitee ontvang. Dit maak ons hande sterk en ons “laste”  lig!  (Ouderling Ina Malan -Omsiener Snr. Jeug) .

3.      Verslag deur die BK oor die betrokkenheid van leraars by ons lidmate: Binne die gemeente se strategie dat ons ʼn missionêre gemeente is, gebaseer op ‘n kleingroepbedieningsmodel, het ons tog ook besluit dat ons meer na mekaar wil uitreik. Om dit te bewerkstellig sal die volgende werkswyse gevolg word:

·       Onbetrokke lidmate

            Hierdie lidmate is steeds op ons gemeente se databasis, maar woon heel moontlik geen   eredienste by nie. Die name van die lede word deur gegee aan ons kleingroepe wat versoek          word om net kontak met hulle te maak, 'n hand van vriendskap uit te reik en as kommunikasie    kanaal na hulle te dien.

·       Lidmate in kleingroepe

            Die kleingroepe word verdeel tussen die twee leraars. Afsprake word via die gemeentekantoor     met herderleiers gemaak en leraars besoek die kleingroepe sistematies soos hulle program dit         toelaat.

·       Pastoraat

            Gewone pastorale besoeke gaan steeds voort, hetsy op versoek van lidmate of soos deur leraars           geïnisieer.

·       Nuwe lidmate

            Nuwe lidmate word kwartaalliks na die bekenstellingsgeleentheid vir nuwe lidmate genooi, waar   hulle met die gemeente se werksaamhede vertroud raak en van die leiers in die gemeente          ontmoet. Hulle word so gou moontlik by kleingroepe ingeskakel.

·       Senior lidmate

            Ds Tewie Pieters besoek die senior lidmate op 'n sistematiese wyse. Hy hanteer ook hulle             pastoraat, tensy die ander leraars versoek word om daarby betrokke te raak.

·       Dooplidmate / senior jeug

            Ons jeugwerkers hanteer die pastoraat soos versoek en van kennis geneem. Senior jeug word    aangemoedig om by kleingroepe vir die jeug in te skakel, onder leiding van die jeugwerker.

Binne ons huidige strategie staan dit enige lidmaat steeds vry om ter enige tyd leraars te kontak om hulle persoonlik aan huis te kom besoek. 

Ons bevestig opnuut ons strategie soos saamgevat in ons slagspreuk vir 2011:  “Eldoraigne Familiekerk – Missionêre gemeente in 'n jaar van omgee”. Versorging is ons almal se verantwoordelikheid omdat ons 'n geloofsfamilie is. Lidmate word steeds aangemoedig om by kleingroepe in te skakel en deel te wees van ons missionêre strewe.

4.      Finansies

Die doel van die FIN-KOMITEE van die NG ELDORAIGNE FAMILIEKERK:

Om die finansiële funksie van NG Eldoraigne Familiekerk te verrig ooreenkomstig erkende rekeningkundige praktyke. Dit word as volg gedoen:

·       Opstel van ʼn jaarlikse begroting ooreenkomstig die lys van prioriteite wat deur die gemeenteraad verskaf word;

·       Gereelde monitor (maandeliks) van die stand van die kerk se finansies en terugvoer aan die gemeenteraad;

·       Advies aan die gemeenteraad rakende enige finansiële aangeleentheid wat die kerk se finansies beïnvloed of kan beïnvloed.

Die huidige FIN bestaan uit:

Pieter Fourie Snr.                       [Voorsitter]

Andre Joubert (Leraar )            [Ondervoorsitter]

Francois van Staden                 [Gemeentebestuurder]

Cisca Coetzee                           [Fin admin beampte]

Johann Kaltwasser                    [Lid van die Gemeenteraad]

Gerda Reyneke                        [Addisionele lid]

Die vergaderings van FIN word gewoonlik die tweede Dinsdag (09:00) van elke maand gehou en is oop vir enige belangstellendes.